కిష్కిందపురి మూవీ రివ్యూ - హారర్ థ్రిల్లర్ విశ్లేషణ

కిష్కిందపురి మూవీ రివ్యూ - హారర్ థ్రిల్లర్ విశ్లేషణ (3/5)

ఈ వారం రీలీజ్ అయిన సినిమాలలో మిరాయ్తో పాటు ప్రేక్షకుల దృష్టిని ఆకర్షించిన మరో సినిమా "కిష్కిందపురి". హారర్ జోనర్‌లో ప్రత్యేకమైన కథాంశంతో రూపొందిన ఈ చిత్రం, బెల్లంకొండ శ్రీనివాస్ మరియు అనుపమ పరమేశ్వరన్ జంటగా తెరపైకి వచ్చింది. చిత్రానికి వచ్చిన రెస్పాన్స్, కథ యొక్క థ్రిల్ లెవెల్, మరియు టెక్నికల్ బృందం పనితీరును ఇప్పుడు సమీక్షిద్దాం.

కథ:

1989లో కిష్కిందపురి గ్రామం దగ్గర ఉన్న సువర్ణమాయ రేడియో స్టేషన్‌లో ఆరుగురు యువకులు మరణించడం ద్వారా కథ మొదలవుతుంది. ఆత్మ మిస్టరీతో ముడిపడిన ఈ సంఘటన, ప్రస్తుతకాలంలోకి వస్తుంది. ఈ సమయంలో రాఘవ్ (బెల్లంకొండ శ్రీనివాస్), మైథిలి (అనుపమ పరమేశ్వరన్) అనే ప్రేమజంట వాకింగ్ ఘోస్ట్ టూర్ అనే కంపెనీకి గైడ్లుగా పనిచేస్తారు. వారి యాత్ర ఒక దశలో అదే రేడియో స్టేషన్‌కి చేరుతుంది. అక్కడ ఒక ఆత్మ, రేడియో రూపంలో భయాందోళన కలిగిస్తూ, వారందరినీ ప్రాణాలు తీస్తానని హెచ్చరిస్తుంది. ఆ ఆత్మ వెనుక ఉన్న నిజమైన కారణం ఏమిటి? దాని గతం ఏమిటి? ఈ సస్పెన్స్‌ను డైరెక్టర్ చివరి వరకు కొనసాగిస్తూ, ప్రేక్షకులకు థ్రిల్లింగ్ ఎక్స్‌పీరియన్స్ అందించారు.

టెక్నికల్ విశ్లేషణ

• సినిమాటోగ్రఫీ ప్రధాన ఆకర్షణ. ఎక్కువ శాతం రాత్రి పూట షూటింగ్ కాబట్టి ప్రొడక్షన్ టీం పనితీరును మెచ్చుకోవలసిందే.
• ఆర్ట్ డిజైన్ మరియు ప్రొడక్షన్ విలువలు బాగున్నాయి.
• స్టంట్ సీక్వెన్సులు రియలిస్టిక్‌గా తెరకెక్కించబడ్డాయి.
• కొన్ని చోట్ల లాజిక్ గ్యాప్స్ ఉన్నప్పటికీ, సౌండ్ డిజైన్ వాటిని కవర్ చేస్తుంది.

ప్రధానమైన హైలైట్స్

• హారర్ సినిమాలకు కీలకమైన సౌండ్ ఎఫెక్ట్స్ విషయంలో ప్రత్యేక శ్రద్ధ తీసుకోవటంలో టీం నూటికి నూరు శాతం సక్సెస్ అయ్యింది.
• కోపం, అసూయ లతో రగిలే ఒక ఆత్మ కథే "కిష్కిందపురి". హారర్ జోనర్ లో అద్భుతంగా తెరకెక్కించిన తీరు ప్రేక్షకులను సీట్లకు అతుక్కునేలా చేసింది.
• ఇక బెల్లంకొండ శ్రీనివాస్, అనుపమ వారి వారి పాత్రలకు తగ్గట్టుగా ఎక్కడా తీసిపోకుండా నటనాప్రతిభ చూపించారు.
• డ్రామా, ఎమోషన్స్‌తో పాటు హారర్ ఎలిమెంట్స్‌ని సమతుల్యం చేసిన దర్శకుడు.

లోపాలు

• ఫస్ట్ హాఫ్‌లోని కొన్ని సన్నివేశాలు నెమ్మదిగా అనిపించాయి.
• ఎడిటింగ్ లో మరింత కాంపాక్ట్ ఉండి ఉంటే కథనం మరింత క్రిస్ప్‌గా అనిపించేది.
• అనవసరమైన డ్యూయెట్

తుది మాట (Verdict)

"కిష్కిందపురి" ప్రేక్షకులను మొదటి నిమిషం నుంచే కట్టిపడేసేలా చేయకపోయినా, రెండవ భాగంలో ఉత్కంఠను పెంచుతూ సస్పెన్స్‌ను సజావుగా నడిపింది. హారర్ సినిమాలను ఇష్టపడే ప్రేక్షకులకు ఈ చిత్రం తప్పకుండా సరైన ఎన్టర్టైన్‌మెంట్‌ను ఇస్తుంది. ఎలాంటి అంచనాలు లేకుండా వెళ్లినవారికి మరింత థ్రిల్లింగ్ అనుభూతి గ్యారంటీ.

చిన్నపిల్లలు, ఫ్యామిలీ ఆడియెన్స్‌కి అయితే ఇది తగిన సినిమా కాదని చెప్పాలి.